പിറവം : ഗ്രാമപഞ്ചായത്തിന്റെ കീഴിലുള്ള പ്രധാന വിനോദസഞ്ചാര കേന്ദ്രമായ അരീക്കലിൽ ഓണാഘോഷത്തോട് അനുബന്ധിച്ച് ‘അരീക്കൽ ഫെസ്റ്റ്’ സംഘടിപ്പിക്കുന്നു. ഇതിന് മുന്നോടിയായുള്ള വിപുലമായ സ്വാഗതസംഘം രൂപീകരണ യോഗം പാമ്പാക്കുട ഗ്രാമപഞ്ചായത്ത് പ്രസിഡന്റ് ഷീല ബാബു ഉദ്ഘാടനം ചെയ്തു. പ്രകൃതിരമണീയമായ അരീക്കൽ ടൂറിസ്റ്റ് കേന്ദ്രത്തിന്റെ പ്രാധാന്യം കൂടുതൽ ആളുകളിലേക്ക് എത്തിക്കാനും, പ്രദേശവാസികൾക്കും വിനോദസഞ്ചാരികൾക്കും മികച്ചൊരനുഭവം സമ്മാനിക്കാനും പഞ്ചായത്തിന്റെ നേതൃത്വത്തിൽ നടത്തുന്ന ഈ ഫെസ്റ്റിലൂടെ സാധിക്കുമെന്ന് അവർ പറഞ്ഞു. ഗ്രാമപഞ്ചായത്ത് വൈസ് പ്രസിഡന്റ് ആശിഷ് എം. ജോൺ യോഗത്തിൽ അധ്യക്ഷത വഹിച്ചു. ആഗസ്റ്റ് 23 മുതൽ 29 വരെയാണ് വിപുലമായ രീതിയിൽ ഫെസ്റ്റ് നടത്താൻ തീരുമാനിച്ചിരിക്കുന്നത്. ആഘോഷങ്ങളുടെ ഭാഗമായി ആഗസ്റ്റ് 27, 28, 29 തീയതികളിൽ വിവിധ കലാപരിപാടികളും അരങ്ങേറും. ഭക്ഷ്യ-സിവിൽ സപ്ലൈസ് വകുപ്പ് മന്ത്രി അനൂപ് ജേക്കബ്, സാംസ്‌കാരിക വകുപ്പ് മന്ത്രി പി. സി. വിഷ്ണുനാഥ്‌ തുടങ്ങിയ പ്രമുഖർ ഫെസ്റ്റിന്റെ വിവിധ ചടങ്ങുകളിൽ അതിഥികളായി പങ്കെടുക്കും.

ബ്ലോക്ക് പഞ്ചായത്ത്‌ പ്രസിഡന്റ്‌ നെവിൻ ജോർജ്, ബ്ലോക്ക് പഞ്ചായത്ത് അംഗങ്ങളായ ജിജോ കെ. മാണി, മിനി ജേക്കബ്, മറ്റ് ഗ്രാമപഞ്ചായത്ത്‌ അംഗങ്ങൾ എന്നിവർ യോഗത്തിൽ സന്നിഹിതരായിരുന്നു. വ്യാപാരി വ്യവസായി ഏകോപന സമിതി പ്രസിഡന്റ്‌ ഷാജു അമ്മനംകോട്ടിൽ, സെക്രട്ടറി വർഗീസ് വാഴപ്പറമ്പിൽ, പോലീസ് സബ് ഇൻസ്‌പെക്ടർ സിബി അച്യുതൻ, ഹെൽത്ത് ഇൻസ്‌പെക്ടർ ആര്യ വിജയൻ, വിവിധ റെസിഡൻസ് അസോസിയേഷൻ ഭാരവാഹികൾ, പ്രദേശവാസികൾ തുടങ്ങിയവർ യോഗത്തിൽ സംസാരിച്ചു. വിപുലമായ ഒരുക്കങ്ങളാണ് ഫെസ്റ്റിനായി പഞ്ചായത്ത് അധികൃതർ പദ്ധതിയിടുന്നത്.

ചിത്രം : പാമ്പാക്കുട അരീക്കൽ ഫെസ്റ്റിന് മുന്നോടിയായുള്ള സ്വാഗതസംഘം രൂപീകരണ യോഗം ഗ്രാമപഞ്ചായത്ത് പ്രസിഡന്റ് ഷീല ബാബു ഉദ്ഘാടനം ചെയ്യുന്നു.