പിറവം : മുളന്തുരുത്തി ഗ്രാമപഞ്ചായത്ത് അഞ്ചാം വാർഡിൽ മേച്ചേരിക്കുന്ന്-തുപ്പംപടി റോഡിലെ മാലിന്യശുചീകരണ പ്രവർത്തനം നടത്തിയ ഡിവൈഎഫ്ഐ പ്രവർത്തകർക്കെതിരെ മാലിന്യം നിക്ഷേപിച്ചു എന്നാരോപിച്ച് 5000 രൂപ പിഴ ചുമത്തി നോട്ടീസ് അയച്ച മുളന്തുരുത്തി ഗ്രാമപഞ്ചായത്ത് യുഡിഎഫ് ഭരണസമിതിയുടെ നടപടിക്കെതിരെ ഡിവൈഎഫ്ഐയുടെ ആഭിമുഖ്യത്തിൽ മേച്ചേരിക്കുന്നിൽ പന്തം കൊളുത്തി പ്രകടനം നടത്തി പ്രതിഷേധിച്ചു.

മേച്ചേരിക്കുന്ന്-തുപ്പംപടി റോഡിൽ ഉണ്ണി ദേവി ക്ഷേത്രത്തിനു സമീപം റോഡിന് ഇരുവശവും കാലങ്ങളായി സാമൂഹികവിരുദ്ധർ മാലിന്യം നിക്ഷേപിച്ചുവരികയായിരുന്നു. രോഗങ്ങൾ പടരാൻ കാരണമാകുന്ന വിധം മാലിന്യനിക്ഷേപം രൂക്ഷമാവുകയും ദുർഗന്ധം മൂലം ജനങ്ങൾക്ക് വഴിയിലൂടെ യാത്ര ചെയ്യാൻ പറ്റാതെ വരികയും ചെയ്ത സാഹചര്യത്തിലാണ് ഡിവൈഎഫ്ഐ ,കാരിക്കോട് ഈസ്റ്റ് യൂണിറ്റിലെ പ്രവർത്തകർ മാലിന്യങ്ങൾ നീക്കം ചെയ്തത്. മാലിന്യങ്ങൾ അത് കിടന്ന ഇടത്തുനിന്ന് നീക്കം ചെയ്ത് ഒരു സ്ഥലത്ത് കൂട്ടിവെയ്ക്കുകയും യൂണിറ്റിലെ പ്രവർത്തകർക്ക് സംസ്കരിക്കാൻ കഴിയാത്ത അളവിൽ മാലിന്യങ്ങൾ ലഭിച്ചതിനെ തുടർന്ന് തദ്ദേശ സ്വയംഭരണവകുപ്പിൻ്റെ ജിയോ ടാഗിംഗ് സേവനം വഴി ടാഗ് ചെയ്തു പോർട്ടലിൽ ഡി.വൈ.എഫ് ഐ പരാതി സമർപ്പിക്കുകയും ചെയ്തിരുന്നു .

മാലിന്യമുക്ത ക്യാമ്പയിന്റെ ഭാഗമായി സംസ്ഥാനമെമ്പാടും വിപുലമായ ശുചീകരണ പ്രവർത്തനങ്ങൾ നടന്നു വരുന്ന ഘട്ടത്തിലാണ് നാട്ടിലെ യുവാക്കൾ ചേർന്ന് മാതൃകാപരമായി നടത്തിയ പ്രവർത്തനത്തെ അംഗീകരിക്കാതെ മുളന്തുരുത്തി ഗ്രാമപഞ്ചായത്ത് യുഡിഎഫ് ഭരണസമിതി ഡിവൈഎഫ്ഐ പ്രവർത്തകരാണ് പ്രസ്തുത സ്ഥലത്ത് മാലിന്യം നിക്ഷേപിച്ചത് എന്ന് ആരോപിച്ച് 5000 രൂപ പിഴ ചുമത്തി നോട്ടീസ് അയച്ചിരിക്കുന്നത്.

മാലിന്യം നിക്ഷേപിച്ച യഥാർത്ഥ കുറ്റക്കാരെ കണ്ടെത്തുകയോ ഇത്തരം പ്രദേശങ്ങളെ മാലിന്യ മുക്തമാക്കുന്നതിനോ യാതൊരു വിധ നടപടികളും സ്വീകരിക്കാതെ സേവനപ്രവർത്തനത്തിൽ ഏർപ്പെട്ട ചെറുപ്പക്കാരെ കുറ്റക്കാരാക്കുന്നതിലൂടെ തെറ്റായ മാതൃകയാണ് യുഡിഎഫ് ഭരണസമിതി ജനങ്ങൾക്ക് നൽകുന്നതെന്നും മാലിന്യം നിക്ഷേപിക്കുന്ന യഥാർത്ഥ കുറ്റക്കാർക്കുള്ള പ്രോത്സാഹനം കൂടിയാണ് യുഡിഎഫ് ഭരണസമിതിയുടെ നടപടിയെന്ന് ഡി.വൈ.എഫ് ഐ ആരോപിച്ചു. പഞ്ചായത്തിൻ്റെ നടപടിക്കെതിരെ പരാതി നൽകുകയും നിയമ നടപടികളുമായി മുന്നോട്ട് പോകുമെന്ന് ഡി.വൈ.എഫ് ഐ പ്രവർത്തകർ പറഞ്ഞു.

പ്രതിഷേധ മാർച്ച് ഡി.വൈ എഫ് ഐ മേഖലാ സെക്രട്ടറി ലിജോ ജോർജ് ഉദ്ഘാടനം ചെയ്തു . പ്രസിഡൻ്റ് എം.എസ് ഹരികൃഷ്ണൻ ,യൂണീറ്റ് പ്രസിഡൻ്റ് നിജിൻ എൻ പി, അരുൺ പോട്ടയിൽ, വി പി മണി, തോമസ് പേക്കേൽ, ജോയൽ കെ ജോയ് എന്നിവർ സംസാരിച്ചു.

ചിത്രം : ശുചീകരണ പ്രവർത്തനം നടത്തിയ യുവാക്കൾക്ക് പിഴ ചുമത്തിയ മുളന്തുരുത്തി ഗ്രാമപഞ്ചായത്ത് യു ഡി എഫ് ഭരണ സമിതിയുടെ നടപടിക്കെതിരെ നടത്തിയ പ്രതിഷേധ മാർച്ച് ഡി.വൈ എഫ് ഐ മേഖലാ സെക്രട്ടറി ലിജോ ജോർജ് ഉദ്ഘാടനം ചെയ്യുന്നു.