ഇലഞ്ഞി : ഹരിത കർമ്മ സേന നൽകുന്ന സേവനങ്ങളും പ്രവർത്തനങ്ങളും കൂടുതൽ കൃത്യതയുള്ളതും സുതാര്യവും ആക്കുന്നതിലേക്കായി ഇലഞ്ഞി പഞ്ചായത്തിലെ മുഴുവൻ വീടുകളിലും നടപ്പിലാക്കുന്ന ഹരിത മിത്രം സ്മാർട്ട് ഗാർബേജ് ആപ്പിന്റെ ഉദ്ഘാടനം പഞ്ചായത്ത് പ്രസിഡന്റ് പ്രീതി അനിൽ, ഹരിത കർമ്മ സേന ലീഡർ കുമാരി ഭാസ്ക്കരന് ആപ്പ് കൈമാറിക്കൊണ്ട് ഉദ്ഘാടനം ചെയ്തു.

കെൽട്രോണിന്റെ സാങ്കേതിക സഹായത്തോടുകൂടിയാണ് പഞ്ചായത്തിലെ മുഴുവൻ വീടുകളിലും ക്യൂ ആർ കോഡ് സ്ഥാപിക്കുന്നത്. ഹരിത കർമ്മ സേന അംഗങ്ങൾ എല്ലാ വാർഡുകളിലെയും വീടുകൾ ,ഓഫീസ്, കടകൾ എന്നിവിടങ്ങളിൽ സർവ്വേ നടത്തി ക്യു ആർ കോഡ് പതിപ്പിക്കും .സർവ്വേ കഴിയുമ്പോൾ തന്നെ ഉപഭോക്താക്കൾ തന്നിട്ടുള്ള മൊബൈൽ നമ്പറിൽ യൂസർ ഐഡിയും പാസ്സ്‌വേർഡും ലഭിക്കുമെന്നും പ്രസിഡന്റ് അറിയിച്ചു.

ഈ ആപ്ലിക്കേഷനിലൂടെ സേവനങ്ങൾ ആവശ്യപ്പെടാനും പരാതികൾ അറിയിക്കുവാനും മലിനീകരണ പ്രവർത്തനങ്ങൾ നിമിഷങ്ങൾക്കകം പഞ്ചായത്തിൽ അറിയിക്കുവാനും സാധിക്കും.

ഓരോ മാസവും ഹരിത കർമ്മ സേന അംഗങ്ങൾ അപ്ലിക്കേഷൻ ഉപയോഗിക്കുമ്പോൾ എല്ലാ വിവരങ്ങളും പഞ്ചായത്തിന് പെട്ടെന്ന് തന്നെ ഈ സംവിധാനത്തിലൂടെ ലഭ്യമാകും. പഞ്ചായത്ത് വൈസ് പ്രസിഡന്റ് എം.പി.ജോസഫ് അധ്യക്ഷത വഹിച്ചു. വിദ്യാഭ്യാസ ആരോഗ്യ സ്ഥിരം സമിതി അദ്ധ്യക്ഷ മാജി സന്തോഷ്, വികസനകാര്യ സ്ഥിര സമിതി അധ്യക്ഷ ഷേർളി ജോയി, മോളി എബ്രഹാം, ജോർജ് ചമ്പമല ,ജയശ്രീ സനൽ, അഡ്വക്കേറ്റ് അന്നമ്മ ആൻഡ്രൂസ്, സുരേഷ് ജോസഫ്, സുമോന്‍ ചെല്ലപ്പൻ, സന്തോഷ് കോരപ്പിള്ള, സുജിതാ സദൻ, പഞ്ചായത്ത് സെക്രട്ടറി തോമസ് ഉമ്മൻ, സിഡിഎസ് ചെയർപേഴ്സൺ വത്സ വർഗീസ് തുടങ്ങിയവർ സംസാരിച്ചു.

അസി. സെക്രട്ടറി അനിൽ നാരായണൻ, ഹെഡ് ക്ലാർക്ക് അനീഷ് ശങ്കരൻ, വി ഇ ഒ മാരായ ജിഷ, അതിര ഹരിതകർമ്മസേനാ അംഗങ്ങൾ തുടങ്ങിയവർ പങ്കെടുത്തു.

ഫോട്ടോ : ഇലഞ്ഞി പഞ്ചായത്തിലെ സ്മാർട്ട് ഗാർബേജ് ആപ്പിന്റെ ഉദ്ഘാടനം പഞ്ചായത്ത് പ്രസിഡന്റ് പ്രീതി അനിൽ നിർവഹിക്കുന്നു.